కాకినాడ, అక్టోబర్ 2,(పిన్ పాయింట్)
జాతిపిత మహాత్మా గాంధీ జయంతిని పురస్కరించుకుని సిద్ధార్థ నగర్ అసోసియేషన్ ఆధ్వర్యంలో స్థానిక పార్కులో బృహత్ వృక్షారోపణ కార్యక్రమాన్ని శుక్రవారం అత్యంత ఉత్సాహభరిత వాతావరణంలో నిర్వహించారు. కాలనీ అసోసియేషన్ ప్రెసిడెంట్ తోట సుబ్రహ్మణ్యం అధ్యక్షతన జరిగిన ఈ వేడుకకు ప్రముఖ ఆంకాలజీ సర్జన్ డాక్టర్ ప్రశుబు ముఖ్య అతిథిగా హాజరై మొక్కలు నాటారు.
ఈ సందర్భంగా డాక్టర్ ప్రశుబు మాట్లాడుతూ మానసిక ప్రశాంతతకు, శారీరక దృఢత్వానికి స్వచ్ఛమైన వాతావరణం ఎంతో అవసరమని పేర్కొన్నారు. పచ్చని పరిసరాలు, కాలుష్య రహిత గాలి మానవాళి సంపూర్ణ ఆరోగ్యానికి రక్షణ కవచంలా పనిచేస్తాయని, ప్రతి పౌరుడూ బాధ్యతగా మొక్కలను నాటడమే కాకుండా వాటిని కంటికి రెప్పలా కాపాడాలని పిలుపునిచ్చారు.
అనంతరం అసోసియేషన్ ప్రెసిడెంట్ తోట సుబ్రహ్మణ్యం మాట్లాడుతూ మహాత్మా గాంధీ కలలుగన్న స్వచ్ఛమైన, ఆరోగ్యకరమైన సమాజ నిర్మాణానికి ప్రతి ఒక్కరూ నడుం బిగించాలని కోరారు. సిద్ధార్థ నగర్‌ను సంపూర్ణ హరితమయ కాలనీగా తీర్చిదిద్దడమే తమ అసోసియేషన్ ప్రధాన ధ్యేయమని స్పష్టం చేశారు.
ఈ కార్యక్రమంలో కాలనీవాసులు, అసోసియేషన్ ప్రతినిధులు, యువత పెద్ద సంఖ్యలో పాల్గొని వివిధ రకాల నీడనిచ్చే, పూల మొక్కలను నాటారు. నాటిన ప్రతి మొక్కనూ సంరక్షిస్తామని స్థానికులు ఈ సందర్భంగా ప్రతిజ్ఞ చేశారు.
ADVERTISEMENT
👆 పూర్తి వివరాల కోసం క్లిక్ చేయండి
